NDORINGEPI STORY BY STANZER TONNY CHAPTER 16 SIR NYATHI Hazvina kumbotorera VaKezi nguva ndefu kurongera rwendo rwavo urwu, nekukasika vakanga vatopedza kugeza kana kuchinja vakange vatochinja vaiva vapinda musafari svutu yavo chena. Waisazosiya nenguwani yakaita yemurara asi iri dziya dzema cowboys iriwo chena zvekare ine kamunhenga padivi apo, imo mutsoka haiwa hauchiona, maiva neshangu yedehwe yaitaridza kuti yaiva yekare zvayo asi yaizvinzwa iri yedehwe asi yaiva tsvuku yaipenya kunge zuva chairo chaiva chasara apa magirovho chete vobva vaiita kunge muimbisi. Iwo mafambiro wati kuzvida ikoko kafambiro kacho kwaiitwa sekwaitsikwa pamsana peshato chaiyo. Shasha iyi zvichibva mumapfekero ayakaiita apa zvakandipa pangidzo yekuti kana mumazuva ayo yaiva isingabviri, ndivo vaiva vana mukoma vaiwanikwa nevatanga. Mumaoko vaiva nebheke duku zvaro, vainge votaridza kunonokerwa sekuti kana kugara pasi havana, takazoneka kune vadzimai vavo ndokubva tabatirwa jongwe tikanzi tonosevesa mberi sezvo takabva apa nguva yekudya kwemadekwana isati yakwana. Takazopinda mumota zuva ronogara miti, ndiye hutu tatarisana neguta reMarondera. Pane chimwe chinhu chandakaona kuti mukusimuka kwedu munzvimbo iyi hama, vavakidzani neshamwari dzaVaKezi vakanga vakaisa meso avo kwatiri. Takangosiiyawo zvakadaro ndokufambira hedu mberi. Sekuuya kwandakaiita pakutanga, ndakanyengetedza motokari mumakomba nemunzira yemombe iyi ndakanaga kumugwagwa unopinda muMarondera. Munguva imweyo mumota hapana ainguno taura nemumwe pada vanhu vakanga vofunga zvemberi sezvandaiitawo hameno, naizvozvo ndakabva ndaisa mumhanzi waMatshikos, iyi ndiyo mhanzi yandaifarira kunyangwe hangu ndaisanzwa mutauro wacho asi ndaidakadzwa nayo zvikuru sei ndiri panzendo kudai. Nenguva pfupi ndakabva ndapinda mumugwagwa uya waibva kuIgava uchiinda Marondera. Kwandiri waisava mutsva sezvo ndakamboshandira nzvimbo yeIgava iyi zvichakadaro ndaifamba nawo nguva zvinji. Ndakambomira zvishoma ndichigadzirisa chigaro changu sezvo ndakanga ndafunga zvemberi zvikuru sei mumwe wangu kuti ndinomupira mafambiro manake atakanga taiita aya. Ndaiziva kuti kana iye aidawo chose kunzwa kuti tafamba zvakadini uye kuziva kuti vabereki vake vaive sei. Yemararamiro namagariro avabereki vake aivapo aizonomupa shanaguro yazvo-VaKezi. Ndakanzwa sekuru voti muzukuru ufambe nesu zvakanaka kumhanya sandiko kusvika. Zvokwadi vakaita sevashopera kudaa vakanga vaona kugadzirira kwandakanga ndoita apa, vakangotaura havo asi zvakambonzwikwa nani ndakanga ndafunga parefu. Sadombo vangu vakapamhidzira havo vakati zvamazvirokwazvo zororo rekisimisi ratakanga topinda mhepo dzemumigwagwa zvikuru sei ngoro dzemoto dzakanga dzosimuka. Hongu zvavaitaura zvaiva zvakanaka chose aiva mashoko echenjedzo asi ini ndaivimba pachangu sokuti ndaizvigonawo chose zvekutyaira izvi, kungotiwo hongu zvemunzira azvina anogonera. Uye akuruma nzeve ndowako. Apa ndipo pakabva pavamba hurukuro muvanhu vandainge ndinavo mumota umu, zvaiva zvanakawo kwete kuti vanhu vanonyarara kuita kunge wakatakura masaga. Ndakatoona kuti zvakanga zvaringana kana vakange voita nyaya kudai hapana aizoona uye kucherechedza kumhanya kwangu. Kuti zvinyatsoite ndakakwidza mafafitera ose emote kuti pasawana anonzwa mhepo yemafambiro emotokari. Ndakabva ndasimuka hangu zvishoma nezvishoma, ndakadzikisa ruzha rwemumhanzi kuti vaitaura ava vawane kunzwanana, nyaya dzacho andina hangu kuda kudziterera idzo nyaya dzavasharukwa ndedzekurima chete, vatete vakanga vatopindirawo madziri ameno kuti vaizvivirawo kupi kuata sevaive nemusha wacho paruzevha. Ndaiita ndichinyudza gumbo mutangi zvishoma nezvishoma zvekuti hapana akambozviona kuti mota yakange yomhanya, mota yatete yaiva yobvuma kuruma mugwagwa, asi andingati ndaimhanya zvakanyanya sezvo mugwagwa wacho wakanga usina kunyatso rurama, ndaifambira pakati pezvikamu zvisere nezvipfumbamwe, asi zvaiiti kana ndosangana nedzimwe mota dzaimira sezvo kamugwagwa ketara kacho kaiva kaya kakamanika kanofamba mota imwe. Avawo kumira kwavaiita vachindipa mukana kuda zvaionekwa kuti ndaiva ndakaruma mugwagwa pachokwadi. Ndakasvika paPicca Dilly ndokuwana pane mapurisa asi vaitaridza kuti vakanga vapedza basa voda kuenda sokuti vaipeta zvirauro zvavo. Ndakadzora mamhanyiro ndichiitira kumira kana ndaizomiswa. Ivo havana havo kuda kundimisa ndokubva ndaendera mberi, zvino apa mugwagwa mota dzakanga davekuti wandei zvikuru sei dzaipinda muMarondera. Ndakazvishaya kuti mota dzese idzi dzaibvepi sekuti kwataiva uku kwaisava nemisha zvekuti waiti pamwe vangadaro vanobva mumaruwa mavanogara. VaKezi ndivo vakazotaura kuti vazhinji vacho vainge vachibva kudhamu kuna Ruzawe uko kwavaiswera vachisasana. Ndakatoona kuti ndakanga ndabuda munyika iyi ndisina kumbosvikako sei, deno waro ndakazviziva mhoti taimbonopindawo mumvuramo naJoy wangu heretichisasana kudaro. Zvisinei takabva tapinda hedu muMarondera, maiva makasviba nevanhu ndodaira kuti vazhinji vavo vaitenga-tenga sezvo wakanga wave mwedzi waZvita unova mwedzi wekisimisi. Ndakabva ndasvika pamhararano inoenda Mutare neye Harare ndichitsvaga mukana wekuti ndikone ndirurame kuguta guru, chokwadi ndakaona kuti pamhararano iyi paiva nebishi chairo mota dzaive dzakawanda dzaisatpmbotipawo mukana wekuti tifambewo, chokwadi apa paitoda mwenje iya inopa mikana yamafambiro mumigwagwa umu. Ndichingonomira kudaro pamota pakabva pazara vanhu vamwe vaitengesa uye vamwe vaitsvaga michovha, ndakabva ndaramba hangu ndakaomesa gotsi ndotarisa kwaibva motokari kuti ndiwane mukana ndipfuure, kana fafitera handina kudzikisa. Pakazowana akandiridzira bhera ndokubva andipawo mukana wekuti ndikone ndipinde mumugwagwa mukuru uyu ndokupinda ndokuenda. Kubva apa kunosvika paHospital paisafambika nyore, tichinopfuura chipatara chikuru cheMarondera ndakangoti fambei zvishomane ndakawana pamberi pacho paine mapurisa asi andina hangu kumiswa, ndichinodarika mugwagwa waiinda nekuHwedza mota dzakanga dzoita shoma mumugwagwa, kubva apa ndakabva ndaivhetemutsa motokari ndatarisa guta reHarare, vasharukwa vangu vakanga havo vakanyura munyaya dzavo, mutokari yakabvuma kuruma mugwagwa zvekuti waingonzwa kuti pfii-pfii ichishinyira. Yakazhamba yakatarisa kuguta zvekuti kana neni ndakanga ndachibata mudhiraivho zvekuti hawaitsukunyuka napaduku pese. Zuva rakanga rasonyura kwatotanga kusviba, mumugwagwa yakange yangova ngwerewere kuchena nemwenje yedzimota, zhinji dzacho dzaiibva nekudivi reHarare dzakatarisa kwataiibva, kudivi kwedu dzaiva shoma pano neapo kungodaro chete zvaibva zvandipa mukana wekuivtemutsa Wild Track yatete iyi, ndaiiti pamberi pangu pakaiita motokari ndaingojekesa mwenje zvakanyanya ndichipa chenjedzo iya yekuti ndouya, kungodaro ndaibva ndapindira mukamwe-mukamwe. Nenguva isipi ndakange ndavepaTollgate ndokubva ndapfuura. Pandakazonosvika paRuwa ndakanga ndofamba zvakadzikamira. Ndakatarisa nguva ngokuuona kuti ndakanga ndafamba maminitsi makumi matatu chete kubva Marondera kusvika paRuwa. Ndakabva ndarurama kumba kuDamafalls. Sekuru vakakanuka pavakanzwa ndavakuti tasvika, kana Vakezi vakanuka vakati mafambiro andakanga ndaiita apa akanga asina kunaka ndakatoseka vachibvunza kuti Marondera takanga tapfuura nepi hanzi handina kumboiona. Takaburuka mumotokari ndokupinda hedu mumba, VaKezi vaitaridza kukatyamara nezvaiona pamba apa, ndakaona kucheuka-cheuka kwavaiita apa kuti vakanga vatorwa nezimba ziguru ravaiona apa. Takapinda mumba ndokukwazisana nevamwe, baba Naa takawana varipo zvekare, ziso rangu rakamhanya ndokunobva ramira paya parakabiwa kare, ndakaona mai vemwana varipo vakanyura musofa vakabata mujaya wedu anova dangwe redu Sameri, ndakabva ndarurama pavaive ndokunogara ndakati kwati-kwati. Ndakanzwa kudziya pavari zvakabva zvazhangandira nemuviri wangu wose, munguvayo ndakanga ndoona ndiri muparadhiso dzvene rerudo. Takazobvunzana mafambiro nehama dzakanga dzasara idzi, aiwa kana zviso zvedu zvaitaura zvoga kuti aiva manake chose. Vakezi vachiona Joy vakabva vamwekukira ndokumuti, “ndipo pauri pano mwanangu”, iye akabva agutsira musoro apo achimwerera, vakabva vabvunzana havo utano. Joy aitaridza kuti aiva ane zvizhinji zvaaida kubvunza asi aidzimaidzwa nesu, uye VaKezi ivaona sababa vake naizvozvo zvimwe zvinhu zvaisabvunzika. Mai Sam havana kana kuzomboda kucheuka kwandiri kutaurawo neni apo vakanga vobvunza amai vavo, baba, hanzvadzi nomnin’ina wake kuna sadombo watanga tauya naye. Ndakaona kusununguka muchiso chake paakuudzwa kuti vaive vatano chose. VaKezi vakabva voendera mberi votsanangura kutambudzika kwakasara kuchiita vabereki vake kubva zvatakamutizisa mukumbo kudaro. Izvi zvakabata mukadzi wangu zvekuti ndakaona kuti kwaingova kushinga chete kana misodzi yaigona kubuda, munongoziva kana nyaya dzotaurwa navasharukwa kudaro panoita kunge pane zvikukutu zvishamiso zvisionekwi zvinenge zvakasara zvikaitika. Vakazopedza havo vomuti zvaiva zvakaringana kubva mukuona kwavo kuti akanga agere zvakanaka. Vakataura chikuru chavakanga vafambira chaiva chekuti vamuone kuti vagone kuzofambisa nyaya dzacho mune zvakanaka. Vakaendera mberi vakati, zvakanaka kunge waona mwana sekuti ukabvunzwa unowana mhinduro, uye vakati vakuwasha takanga taiita vabva kure zvichida hapana aiva neidi uyemano yekuti mwana aripi, nani uye mutano. Vakavimbisa zvekuti nyaya iyi vaizobata zvakanaka sekuti chaiva chishuvo chavo kuona vana tichipinda muwanano yakaropafadzwa. Chikafu chakabva chauya ndokubva vanhu vatanga havo kudya pachitaurwa nhau dzakasiyana-siyana. Tichipedza kudya apa pakabva patangisa nyaya huru yakanga yasanganisa vanhu vakuru kudai yaive nyaya yekurongwa kuona kuti tinga tangire papi maerarano namaroora edu, kwaiva kuda kuona kwotonanga sekuti zvimwe zvese taive takagadzirira nechekare, chataiida kupiwa zuva rekuti munyai wedu achadeedzera riini uye topiwa zuva rekubvisa pfuma nezvimwe, uye zvinodikwa kwavatezvara. Zvakanga zvaenda baba namai kumusha vakanga vasiya varaiira sekuru natete kuti varonge zvinofamba tisavamirire asi kuvaudza danho ratava uyezvava kuitwa. Sekuru ndivo vakazoitanga vopira sadombo wedu vachida kunzwa kuti aiva akasunguka sariini kunoshevedzera uye kuti vapiwe mazuva emaroora. Vakabva vaudza sadombo kuti zvose izvi zvaifanira kuitwa zororo rekisimisi risati rapfuura. Ndakaona kuti sadombo akashamisika nechimbi-chimbi chakanga chiri kuitwa apa. Vakabva havo vativimbisa kuti vaizonosvitsa shoko mukupera kwesvondo rataiva tatarisana naro. Naizvozvo sekuru vakabva vavapa mari yaiita $100 iyo yaiva shizha rimwe chete. Baba Natasha vakapindira vakati kweteba, mari iyi yaiva shoma naizvozvo vakabva vakwira kuimba yavo yekumusoro ndokudzoka vakabata $210 ndokupamhidzira. Sadombo Havana havo chavakapindura kunze kwekutambira mari iya ndoiisa muhombodo yavo yebhachi yemukati. Nguva dzakazoti dzafamba pfumbamwe dzemauro dzakanga dzakwana, takabva taonekana toenda kunorara. Sadombo vakabva vaoneka vakati zvavaia vafambira vakanga vagutsikana, uye kuti vakwanise kumhanyidzana kuti vabatane nenguva sekurehwa kwazvakanga zvaiitwa nasekuru vakati rechimangwana racho vaida kumukira kumba kwemujaya wavo kuChitungwiza, vakabva vati vaizomukira kumusha noMuvhuro. Ndakavabvunza kuti vaiida kuzofamba nguvai vakananga kwakare KuChitungwiza ndigovaperekedza. Vakatiwo sezvo chifumi chacho yaiva svondo, vakati vaida kufamba kuchiri kuseni kuititra vabate vanhu vasati vaenda kudzikereke. Ndakavavimbisa kuti ndaizovapa muchovha. Takabva hedu taparadzana nemhuri yese ndokubva paitwa munamato vanhu voenda havo kunoputsira shaya pasi. Chinhu chandisina kucherechedza ndechekuti vanhu vakafamba sei kuti ngana apinda muimba ipi ngana wapinda mupi, ndakangozoita fungira mumwoyo kuti pada zvaitwa zvemisi yose. Vanhu vese vakabuda ndokusara ndigere pasofa ndiri ndoga, ndaiva ndoshaya kuti ndonanga kwandakanga ndave kurara naBrendon mumazuva akanga adarika aya. Ndakabva ndasimuka ndokubatidza chivhitivhiti ndiwane chaigona kundivaraiidza hangu. Ndakabva ndaitawo rombo rakanaka ndokuona pachitwa zvandaifarira chaizvo paitambwa nhabvu yekumhiri kuchando, waiva mutambo mukuru chaizvo waiva pakati peReal Madrid nechikwata cheBarcelona. Mutambo wacho waitaridza kuti wakanga uchangotanga. Ndakabva hangu ndatowana chakandivaraidza ndiri ndoga kudaro. Dzakazoti nguva dzafamba mutambo wakanga wavakuda kupera ndakazosimudza musoro ndokutarisa kumupanda waiinda kumakamuri edzimba dzatairara ndokuona pakamira Joy akazembera madziro akapeta maoko. Ndakashaya kuziva kuti akanga amira apa kwenguva yakareba zvakadini ndakapererwa kuti ndodini chakazokwanisa kuiita apa kubva pandaiva ndigere apa ndokusimuka ndokufamba ndichiendako kwaaive amire. Ndakasvika ndokumira pamberi pake ndokumubata nemumuchiuno ndokuedza kufamba ndichidududza nemanhendeshure ndichimudhonza kuti tiende kwandaiva ndigere ndichiona bhora kuya. Akabva andibata mumaoko angu nemumagokora zviya zvekuramba zvandaiita izvi. Andina kuiita nharo ndakabva ndadzikisa maoko angu ndomirira ndoda kunzwa zvaitevera, hongu ndaiziva kuti pane mashoko aaizotaura chete. Zvemazvirokwazvo akabva ati, ko uchauya kuzorara nguvai, kuti ndipindure kuti ndaisaziva kuti ndainge ndiri kurara naye muimba imwe ndaisazviziva zvakarambira paruruimi. Ndakabva ndatendeka chivhiti-vhiti ndikamuti ndange ndiri kuuya ndange ndichida kupedzisa kuona bhora. Akabva atendeuka hake oenda kukamuri kwedu akati heya bva ndakakumirira. Ndakasara ndakamira paya ndoshaya kuti ndoenda kupi. Kuti ndotevera here kana kuti ndodii, Ndakabva ndafambisa ndokudzokera pasofa paya pandaive ndigere ndotsvaga remote, ikati wakandiisa kupi. Ndakakudubura pese pese asi hapana chandakaona ndofunga kumhanya mhanya kwandaiva ndoita uye shungu ndiko kwaiita kuti ndisaiione nyore. Ndakazosvika pati ndonoidzima terevhizhoni kumadziro chaiko sokuti kwaigona kuedza ndichingoitsvaga kudaro ndokubva ndatevera mai nhiya vangu vaya. Ndakasvikoti susuru mumba medu muya, shasha yakanga yasodzima mwenje kwangosara iya inenge iri kumusoro kwekabati iya inenge ichipfuta seisingade ichipfutira zvakanjenjemara, mumba munenge muine karima asi uchikwanisa hako kuona zvikuru sei zvinenge zviri pedyo newe. Ndakatarisa mwana wedu ndokuona arere zvake ndakabva ndamufukidza pakare. Ndakadzoka paye pandaifanira kupinda ndirare ndokuona paiva pakavhurwa pakaita ka triangle pakasiya masheets uye pakarongedzwa mapyjamas, ndakabva ndamabata ndoda kupfeka ndokubva ndaona kuti pane chimwe chinhu chandaifanira kuita ndisati ndapinda muzvishongo zvekurarisa izvi. Ndakabva ndabuda ndokunanga kubathroom ndokunovhurira mvura inodziya mutabhu ndokugeza zviya zvekubvisa dikita semunhu akanga aswera achifamba. Ndakadzoka ndokukumura ndokubva ndapfeka. Munguva yese iyi Joy ainge arere nedivi hake akangotarisa zvese zvandaiita apa. Ndakambofunga kuti pada pandaizochinja aizofuratira kana kuvhara kumeso sezvaisiika makare edu asi sandizvo zvakaitika apa, zvamazvirokwazvo akanga ave mai vemba, ndakashaya kuti ushingi hwese ihwohwo akahwuwanepi sezvo mumazuva edu aisambodaro mwana ainyara hake iyeye. Zvisinei ndakapinda mumachira ndokurara sezvaiiva akaiita asi takatarisana ndokubva, ndamubata padama rake, mukumubata kwandakaiita uku ndakaona kuti mwana akanga avekubvumiwa netaundi, sekuti dama rakanga zvino rapfava sedonje chairo. Ndakabva ndatanga kumupuruzira ndokumbira ruregerero rwekunonoka kuuya kuzorara kwandaive ndaiita. Ndisati ndambopedza kutaura kudaro akabva andiisa chigumwe chake chihombe chiya pamuromo zvekuti nyarara, ndokutaura hake iye woti, asi wange waudzwa kuti tainge tiri kuzoshandisa imba imwe. Ndakamupindura ndikati ndagara ndazviona kubva zvaenda maiguru kuimba yavo yekumusoro, izvo kwaani dzaingove nhema zvadzo zvimwe zvacho semurume haufaniri kupererwa nezvekutaura. Takazotandara hedu takarara kudaro ndokubva ndatanga kumuudza mafambiro akatakanga taiita. Ndakamunyepera hangu ndikati zvatakapfuura nepamba pavo pane vanhu vandakaoona vamire muruvanze asi asi handina hangu kucherechedza kuona kuti vaive vanani sezvo ndirini ndaityaira motokari. Kuzomudaro chete ndakanga ndamutenya, mibvinzo yakanga yoiita kunaya oda kubvunzisisa zvakawanda maererano nezvekumba kwavo wotokakanganwa kuti ndaisava nemhinduro kana shananguro dzinopfuura dzaakanga audzwa naVaKezi. Semunhurume uye anoda kufadza mumwe wake handaizoshayawo zvekupindura. Akazotaura imwewo nyaya yakandisvota zvikuru sei apo ndakanga ndakufunga zveumburu. Akanditi ndaifanira kumbomira kusvika mwana akwanisa masvondo matanhatu. Asi mumatauriro aakaita apa aiva erudo zvekuti ndakazvigashira ndokutoona semazuva acho akanga asara aingovawo maviri zvawo sezvo nguva yakanga yafamba kubva zvaasununguka naizvozvo kwakanga kwasara masvondo mashomane. Takazobiwa nehope zvisina ani akarangarira ndokuzomuka rechimangwana acho ndoda kuperekedza sadombo wangu kuChitungwiza. Ndakamuka shasha yatopedza kugadzirira kare yatondimirira, iniwo handina kuda kuzopedza nguva ndakabva ndangogeza kumeso uye mkanwa ivo vachiitirwa svutgadzike. Takabva tabuda takateedzana natete avo vakange voendawo kumba kwavo ini ndichiperekedza sadombo wangu uyu. Ndakapfuura nepa Chitungwiza town centre ndichavatengera magirosa ekuzoendawo nawo kumba kwavo kumusha kana voenda. Ndakabva zvekare ndavapa mari yaiita $20 kuti vaizoshandisa semuchovha. Zvino pakazoti netsei ndepakuti tofamba sei kubva kuti tinange kumba vakabva vati ivo vaisaziva kana vachibva nepataiva tiri apa. Vakati vaiziva kana vachibva nekwaMakoni township, zvisisnei ndakadhiraivha ndokunosvika paMakoni, paya ndokubva vatanga havo kurondedzera mafambiro. Ndakashamisika ndichiona tichisvika pa C junction ndokukona totarisa kuZengeza tichisvika pa JeyDee takangoti fambei zvishoma takasvika paya pane mabhazi akafa akamira asi tisati tasvika paZebra cross takabva takona kuruboshwe ndokuverenga dzimba ndokubva tasvika. Ko zvataiva pedyo nepaTown Centre patakanga tabva paye ndakangoti zvevakuru hazvitaurwi munongoti nzvimbo ndiyo yakurasai kwete kuzovati marasika unenge washora dare. Zvedi takawana vanhu votomira-mira voda kubuda kuenda kudzikereke asi apa gwendo gwakatozogurwa nesu kusvika kwatakaita apa. Takagara hedu ndokubva tazivana navana nevazuru vavo, mukomana wavo mukuru uya takanga totowirirana otondiita mukwasha hanzi tenga doro, ndakazomubata kumeso ndikamuti ndichatenga kana tauya munoda kuzondiripisa mangwana moti mukwasha akatengera tezvara doro asati apinda mumusha. Rakava zuva rakanakisa chose nemhuri yaVaKezi iyi. Ndakazobva apa ndodzokera kwedu kuDamafalls zuva rorereka. Takagara mazuva achifambidzana hawo, takazoti mumwe musi chiri chitatu, takaronga kupinda mudhorobha ini nemudzimai wangu kuti tindotoresa mwana birth certificate, takagadzirira ndokubva tananga paMarket square paya, tichisvika takaona heanoi mashura paiva nendaza yavanhu, vamwe vaigadzirisa mabirth akarasika nevamwe vaitawo mapepa evashakabvu. Takamira mumutsetse uya asi waifamba zvawo. Pakazonetsa paya patakanzi taisakwanisa kutorera apa painzi paitorera vana vanenge vakazvarirwa muharare chete, takanzi tiende kuMakombe building, takabuda hedu ndokubva taenda kwakarehwa kuye. Uko hazvina kumbotinetsa sekuti kwaiva navanhu vashoma. Takabatsirwa mushure me awa imwe takanga tatova naro. Takabva apa ndokupfuura nemudhorobha ndichimboonesawo mumwe wangu nzvimbo dzakasiyana siyana. Rakava zuva rakanakisa chose kwatiri. Mwana takabva tamutengera cotbed yake. Takazodzokera kumba kunze kwotanga kusviba. Mazuva akafamba svondo ndokupera, takazoti hedu uri musi wemugovera takagashira nhare yakabva nekuKarara yaVakezi vachiti shoko rekudanidzira rasvika zvino vamirira nhume kuti dziuye vataure vanzwane kuti zvofambiswa sei, takangotiwo machena awa zvese tosiira kwamuri kana mukarohwwa musachema sekuti mutumwa haana mbonje. Pakaita mazuva ndinodaira maviri takaona imwezve nhare iyi ndiyo yakandi… End of Chapter
5416
Replies
AdChoices